व्हेजिटेबल पुलाव

साहित्य:

१-२ चमचे जिरे
१-२ तमालपत्र
२ तुकडे दालचिनी
५-६ मिरी दाणे
६-७ लवंगा
१ चमचा आल-मिरची पेस्ट
१ कांदा
२-३ वाट्या तांदूळ
१ छोटे गाजर
१/२ सिमला मिरची
१/२ वाटी चिरलेली फरसबी
२ चमचे तेल

कृती:
१. तांदूळ धुऊन चाळणीत निथळत ठेवावेत.
२. प्रथम तेलावर जिरे, तमालपत्र, दालचिनी, मिरी, लवंग १ मिनिट परतावे. थोडी आले-मिरची पेस्ट टाकावी.
३. कांदा उभा चिरुन ५ मिनिटे परतावा. गाजर-सिमला मिरची- फरसबी बारिक चिरुन घ्यावी. आवडत असल्यास मटार दाणे/कॉर्न/फ्लॉवर घालू शकतो.
४. कांदा परतल्यावर उरलेल्या भाज्या परतून घ्याव्या. ५ मिनिटे परतावे.
५. धुतलेले तांदूळ घालून ५ मिनिटे परतावे.
६. तांदुळाच्या दीड (१-१/२) पट पाणी घालावे आणि १-२ शिट्ट्या कराव्यात. जास्त शिट्ट्या करु नयेत, पुलाव जास्त शिजला तर बेचव लागतो. 

शेव पुरी मिक्स चटणी

साहित्य:

१/२ वाटी पुदिना
१/२ वाटी कोथिंबीर
२ इंच चिंच
४ चमचे गूळ
१/२ चमचे जिरे
१०-१२ खजूर
२-३ हिरव्या मिरच्या किंवा लाल तिखट
१-२ छोटे चमचे धणे-जिरे पावडर

कृती:

१. चिंच- गूळ- खजूर थोड्या वेळ पाण्यात भिजवून ठेवावे. खजूरमध्ये बिया असतील तर काढून टाकाव्यात.
२. वरील मिश्रण आणि उरलेले साहित्य एकत्र करुन मिक्सरमध्ये घालावे आणि बारिक पेस्ट करावी.

चटणी तयार!

बटाटा वडा

साहित्य:

५-६ बटाटे
२ tbsp आलं- लसूण - मिरची पेस्ट
१२-१३ कडीपत्ता पाने
चवीनुसार मीठ
१ वाटी बेसन
चवीनुसार तिखट, ओवा, हळद
१ चिमूट सोडा
तेल

कृती:
१. ५-६ बटाटे करायच्या वेळेच्या आधी (१/२ तास तरी आधी) पाणी न घालता फक्त धुऊन कुकरमध्ये ४-५ शिट्ट्या देऊन उकडावे. गार झाले की साले काढून कुस्करावे.
२. त्यात आले, लसूण, मिरची पेस्ट (नसेल तर लाल तिखटही चालते) + कडीपत्ता बारिक चिरुन mix करावे. चवीनुसार मीठ घालावे.
३. १ वाटी बेसनाच्या पीठात थोडे थोडे पाणी घालत इडलीपेक्षा थोडे पातळ पीठ करावे. त्यात आवडीप्रमाणे हळद, तिखट, मीठ, हिंग, ओवा घालावा. १ चिमूट सोडा टाकावा आणि जमत असेल तर २ चमचे तेल अगदी गरम करून टाकावे.
४. कढईत तेल चांगले गरम करुन गॅस थोडासा बारिक करावा. तयार मिश्रणाचे चपटे गोळे करुन पीठात बुडवून मध्यम गॅसवर तळावे. तळायला भज्यांपेक्षा जरा जास्त वेळ लागतो. खूप बारिक गॅसवर तळू नये.